Borealis 2007

TOR GRØNN: Ratkje, Gjertsen, Messiaen, Hvoslef, Hegdal, terning og botanikk

Kl 1600
Stad: Domkirken

Tor Grønn har vore organist i Nykirken på Nordnes i ei årrekke. Derifrå har han bygd opp eit renommè som ein av dei største samtidsmusikktolkarane på orgel i Noreg. Og i ein Bergenssamanheng er det få som har bestild og framførd så mykje ny musikk. Han forandra ei rekke liv då han antakeleg var den første som spelte den store komponisten Olivier Messiaen sin sjeleleg fornyande orgelmusikk i norsk offentlegheit. Ikkje tilfeldig: Tor Grønn studerte i Paris og høyrde Messiaen sjølv spele eigne verk i St Trinitè Kyrkja.

Olivier Messiaen kan også knyttast til festivalkomponist Kaija Saariaho. Han var ein av dei indirekte årsakane til at IRCAM - sjå foredraget til Morten Eide Pedersen 13 mars - blei til. Ved siden av nokre av Messiaen sin meditative orgelstykke frå hans store orgelbok - "Livre d'orgue" - speler Grønn ny norsk musikk. Først ut er bryllupsmarsjen til Maja Ratkje (foto - mest kjend som noisedronning i Fe-mail og Spunk). Deretter står ei urframføringa på plakaten: eit orgelverk med elektronikk av det store lokale komponisttalentet Ruben Sverre Gjertsen (som blei framførd av Pierre Boulez sist sommar). Så blir det "Toccata" av vår lokale festivalprofil Ketil Hvoslef (som Tor Grønn har urframførd ei rekke gonger siden tidleg syttital). Til slutt får me eit nytt verk av Magne Hegdal, ein komponist som i mange år har presentert nye moglege måtar å lage musikk på, i tradisjonar etter Anton Reicha, John Cage, terning og botanikk.

Program

M.S.K. Ratkje: Preludium for a Wedding Ceremony

Ruben Sverre Gjertsen: Pression I
Pression II

Olivier Messiaen: Fra "Livre d'Orgue"
1.Reprises par interversion
2. Pièce en trio
3. Les Mains de l'abime

Ketil Hvoslef: Toccata

Magne Hegdal: Par VI - To kirkestykker: En ny sang og Bruremarsj (urframføring)